ಹೋಗುವ ಮುನ್ನ ಹೇಳಬೇಕೆಂದಿದ್ದು…

ನಿಮ್ಮ ಟಿಪ್ಪಣಿ ಬರೆಯಿರಿ

love

ಇನ್ನೇನೂ ಹೇಳಲು ಉಳಿದಿಲ್ಲ. ಮರಣದ ಕೋಣೆಯ ಬಾಗಿಲು ತಟ್ಟದೆಯೇ ಒಳಗೆ ನುಗ್ಗಬೇಕೆಂದಿರುವೆ.

ಈ ಮೌನದ ದಾರಿಗಳಲ್ಲಿ ಮಾತುಗಳು ಉಸಿರು ಬಿಡಲಾಗದೆ ಬಿಕ್ಕಳಿಸುತ್ತಿವೆ. ಸರಿ ತಪ್ಪುಗಳನ್ನು ಯೋಚಿಸುವ ಹೊತ್ತು ಇದಲ್ಲ. ಇದು ನನ್ನ ಮತ್ತು ಅವಳ ಕೊನೇ ಭೇಟಿ.

ಅವಳ ಮುಂದೆ ಬಂದವನೇ ಅವಳನ್ನು ಬಾಚಿ ತಬ್ಬಿಕೊಂಡ. ಇದು ಕೊನೆಯ ಅಪ್ಪುಗೆ ಈ ಮಹಾ ಮೌನದ ನಡುವೆ ಅವಳ ಬಿಸಿಯುಸಿರ ಸ್ಪರ್ಶ. ಆ ಸ್ಪರ್ಶದಲ್ಲಿ ತಾನು ಮಗುವಂತಾಗುತ್ತಿದ್ದೇನೆ. ನಿಷ್ಕಂಳಕವಾದ ಈ ಪ್ರೀತಿ ಇನ್ನಷ್ಟು ಸುಂದರವಾಗಿ ಕಾಣುತ್ತಿದೆ. ನನ್ನ ನಿರ್ಧಾರ ಸರಿಯಾಗಿದೆ. ಈಗ ಸುಂದರವಾಗಿ ಕಾಣುವುದೆಲ್ಲ ಇನ್ನೊಂದು ಗಳಿಗೆಯಲ್ಲಿ…

ಸತ್ತ ಮೇಲೆ ಆಕಾಶದಲ್ಲಿ ನಕ್ಷತ್ರಗಳಾಗುತ್ತೇವೆಯಂತೆ ದೊಡ್ಡ ಸುಳ್ಳು..!!

ಚಿಕ್ಕಂದಿನಿಂದ ನಾವು ನಂಬಿಕೊಂಡು ಬಂದ ಸುಳ್ಳುಗಳಲ್ಲಿ ಇದೂ ಒಂದು…

ನಾನು ಹೋಗುತ್ತೇನೆ…

ನಿನ್ನ ಕವನಗಳು?

ಈ ಒಂದೇ ಒಂದು ವಾಕ್ಯ ನನ್ನ ಚಿತ್ತ ಚಂಚಲವಾಗುವಂತೆ ಮಾಡಿತು.

ಅವಳು ಬರ ಸೆಳೆದು ಕೊಂಡಳು.. ಇವತ್ತು ನನಗಾಗಿ ಕವನ ಬರೆದಿಲ್ಲವೇನೋ…

ಮುಂದಿನ ಪ್ರತೀ ನಿಮಿಷವೂ ನಾನು ಮಗುವಿನಂತೆ ಮುಗ್ಧತೆಯ ಮೂರ್ತಿಯಾಗಿ ನಲಿದಾಡಿದೆ..

ನಿಷ್ಕಳಂಕ ಪ್ರೀತಿ ತುಂಬಿ ತುಳುಕುವ ಅವಳ ಕಣ್ಣುಗಳು..

ಆ ಕಣ್ಣುಗಳು ನನ್ನನ್ನು ಹಿಂಬಾಲಿಸುತ್ತವೆ, ಆಸೆಯಿಂದ ನೋಡುತ್ತವೆ…

ಬಣ್ಣದ ಕಾಗದಗಳಿಂದ ಸುತ್ತಿದ್ದ ಪೊಟ್ಟಣವನ್ನು ನನ್ನ ಕೈಯಿಂದ ಕಿತ್ತುಕೊಂಡಿದ್ದಾಳೆ.

ಅವಳ ಆ ನೋಟ ನನ್ನನ್ನು ಕೊಲ್ಲುತ್ತಿದೆ ಅಲ್ಲ…ಮರುಜೀವ ಕೊಡುತ್ತಿದೆ.

ಕವನಗಳ ಸಾಲು ಎಲ್ಲಿ?

ಹಾಂ…ಅದು ಹುಟ್ಟುತ್ತಿದೆ…

ಈಗೇನು ಮಾಡುತ್ತಿ? ಇಲ್ಲ, ನಿನಗಾಗಿ ಹುಟ್ಟುತ್ತಿರುವ ಸಾಲುಗಳನ್ನು ನಾನು ಅನಾಥ ಮಾಡಲ್ಲ …

ಹೀಗಿರುವಾಗಲೂ ನೀ?

ಇಲ್ಲ, ನನ್ನೆದೆಯ ಸಾಲುಗಳು ನಿನ್ನನ್ನೇ ಬಂದು ಸೇರುವುವು. ಹಾಗಾದರೆ ಆ ಸಾಲುಗಳನ್ನೆಲ್ಲಾ ಪೋಣಿಸಿ ಕವನ ಬರೆದು ಕೊಡು

ಕವನ?

ಹಾಂ…ಕವನ!!

ಅವಳು ತನ್ಮಯಳಾಗಿ ಕುಳಿತಳು ನಾನು ಅವಳ ಕಿವಿಯಲ್ಲಿ ಮೆಲ್ಲನೆ ಉಸುರಿದೆ

ನೀನು..

ನಾನು?

ಹೌದು

ನೀನೆ ನನ್ನ ಕವನ.

ಮದ್ವೆ ಯಾವಾಗ? ಷರತ್ತುಗಳು ಅನ್ವಯಿಸುತ್ತವೆ!

ನಿಮ್ಮ ಟಿಪ್ಪಣಿ ಬರೆಯಿರಿ

marriage

ನೆಯಲ್ಲಿ ವಯಸ್ಸಿಗೆ ಬಂದ ಹೆಣ್ಮಕ್ಕಳು ಇದ್ದಾರೆ ಎಂದರೆ ಅಪ್ಪ ಅಮ್ಮನ ಚಿಂತೆ ಜಾಸ್ತಿಯಾಗುತ್ತಾ ಹೋಗುತ್ತೆ. ಮಗಳಿಗೆ ಗಂಡು ಹುಡುಕಬೇಕಾದ ಜವಾಬ್ದಾರಿ ಒಂದೆಡೆಯಾದರೆ, ಮಗಳ ಮದ್ವೆ ಯಾವಾಗ? ಎಂದು ವಿಚಾರಿಸುವ ನೆರೆಕೆರೆ ಸಂಬಂಧಿಕರ ಪಿರಿಪಿರಿ ಬೇರೆ. ನನಗೆ ಈಗ ಮದ್ವೆ ಬೇಡಪ್ಪಾ…ನಾನು ಇನ್ನೂ ಓದ್ಬೇಕು. ನನ್ನ ಕಾಲಿನ ಮೇಲೆ ನಾನೇ ನಿಂತುಕೊಳ್ಳಬೇಕು ಎಂಬ ಹಠ ಮಗಳದ್ದು. ಅಪ್ಪ ಅಮ್ಮ ಮಗಳ ನಿರ್ಧಾರಕ್ಕೆ ಹೂಂ ಅಂದು ಬಿಡುತ್ತಾರೆ. ಆದ್ರೆ ಈ ಸಂಬಂಧಿಕರು ಬಿಡಬೇಕಲ್ವಾ? ಇನ್ನೆಷ್ಟು ಓದಿಸ್ತೀರಾ? ಈಗ ಕೆಲಸವೂ ಸಿಕ್ಕಿ ಆಯ್ತು. ಒಳ್ಳೆ ಮನೆತನ ನೋಡಿ ಮದ್ವೆ ಮಾಡಿಬಿಡಿ ಎಂಬ ಉಪದೇಶವನ್ನು ಕೊಡುತ್ತಾ ಇರುತ್ತಾರೆ. ಅದರಲ್ಲಿ ಕೆಲವರು, ಮಗಳು ಮದ್ವೆ ಈಗ ಬೇಡ ಅಂತಿದ್ದಾಳಲ್ಲಾ? ಅವಳಿಗೆ ಲವ್ವು ಗಿವ್ವು ಏನಾದ್ರೂ ಆಗಿದೆಯಾ ಅಂತ ವಿಚಾರಿಸಿ. ಈಗಿನ ಮಕ್ಕಳಲ್ವಾ…ಅವರು ಜಾತಿ ಗೀತಿ ಏನೂ ನೋಡಲ್ಲ. ಅವರಿಗೆ ಹುಡುಗ ಇಷ್ಟ ಆದ ಅಂದ್ರೆ ಮುಗೀತು. ಕೈಯಲ್ಲಿ ಕೆಲಸ ಇದೆ, ಒಳ್ಳೆ ಸಂಬಳವೂ ಇದೆ ಹೀಗಿರುವಾಗ ಜೀವನ ಮಾಡಲು ಕಷ್ಟ ಏನೂ ಇಲ್ಲ ಎಂದು ತಮಗಿಷ್ಟವಾದ ಹುಡುಗನ ಜತೆ ಮದ್ವೆ ಮಾಡಿಕೊಳ್ಳಾರೆ ಎಂದು ಇದೇ ರೀತಿ ಮದ್ವೆ ಆದ ಹೆಣ್ಮಕ್ಕಳ ಕತೆಗಳನ್ನು ಉದಾಹರಣೆ ಸಮೇತಕೊಟ್ಟು ಅಪ್ಪ ಅಮ್ಮನ ಮನಸ್ಸಲ್ಲಿ ಆತಂಕ ಸೃಷ್ಟಿಸುತ್ತಾರೆ. ಮದ್ವೆ ವಯಸ್ಸಿಗೆ ಬಂದ ಮಗಳು ದೂರದ ಊರಲ್ಲಿ ದುಡಿಯುತ್ತಿದ್ದರೆ ಮತ್ತೆ ಹೇಳ್ಬೇಕಾ? ಇಂಥದ್ದೇ ಕತೆಗಳಿಗೆ ಇನ್ನಷ್ಟು ಉಪ್ಪು ಖಾರ ಬೆರೆಸಿ ಹೇಳಿ ಕೊಡುವ ಸಂಬಂಧಿಕರು ಪ್ರತೀ ಕುಟುಂಬದಲ್ಲೂ ಇದ್ದೇ ಇರ್ತಾರೆ. ಹೇಗೋ ಮಗಳ ಮದ್ವೆ ಮಾಡಿಸಿದರಾಯ್ತು ಎಂದು ಮನೆಯವರು ವರಾನ್ವೇಷಣೆಗೆ ತೊಡಗುತ್ತಾರೆ.

ವರಾನ್ವೇಷಣೆ ಎಂಬುದು ಹೆಣ್ಣು ಹೆತ್ತವರ ಪಾಲಿಗೆ ದೊಡ್ಡ ಸವಾಲು. ಮ್ಯಾರೇಜ್ ಬ್ರೋಕರ್‌ಗಳು, ಸುದ್ದಿ ಪತ್ರಿಕೆಯಲ್ಲಿ ಮ್ಯಾಟ್ರಿಮನಿ ಪೇಜ್, ಮ್ಯಾರೇಜ್ ಬ್ಯೂರೋ, ಮ್ಯಾಟ್ರಿಮೋನಿ ಸೈಟ್ ಎಲ್ಲೆಂದರಲ್ಲಿ ಸೂಕ್ತವರನಿಗಾಗಿ ಹುಡುಕಾಟ ಆರಂಭವಾಗುತ್ತದೆ. ಈ ಹುಡುಕಾಟವೂ ಇಂಟರೆಸ್ಟಿಂಗ್ ಆಗಿರುತ್ತದೆ. ಹುಡುಕಾಟದ ಫಸ್ಟ್ ಸ್ಟೆಪ್ ಅಂದ್ರೆ ಫೋಟೋ.ಅಪ್ಪ ಅಮ್ಮ ಮೊದಲು ಹುಡುಗಿಯ ಪೋಸ್ಟ್ ಕಾರ್ಡ್ ಸೈಜ್ ಫೋಟೋ ರೆಡಿ ಮಾಡಿಟ್ಟುಕೊಳ್ಳುತ್ತಾರೆ. ಸ್ಟುಡಿಯೋಗೆ ಹೋಗಿ ಪೋಸ್ಟ್ ಕಾರ್ಡ್ ಸೈಜ್ ಫೋಟೋ ತೆಗಿಬೇಕು ಅಂದ ಕೂಡಲೇ ಫೋಟೋಗ್ರಾಫರ್‌ಗೆ ಇದು ವರಾನ್ವೇಷಣೆಗೆ ಇರುವ ಫೋಟೋ ಎಂದು ಗೊತ್ತಾಗಿ ಬಿಡುತ್ತದೆ. ಇಂಥಾ ಫೋಟೋಗಳಲ್ಲಿ ಹುಡುಗಿ ಸೀರೆ ಉಟ್ಟ ಫೋಟೋ ಬೇಕೇ ಬೇಕು. ಫೋಟೋ ತೆಗೆದಾದ ಮೇಲೆ ಅದರ ಪ್ರತಿ ಬ್ರೋಕರ್ ಕೈಗೆ ಸಿಕ್ಕಿ, ವಧು ಅನ್ವೇಷಣೆ ಮಾಡುವ ಹುಡುಗನ ಕುಟುಂಬಗಳ ಮುಂದೆ ಇದು ಹೇಗಿದೆ ನೋಡಿ…ಎಂಬ ಪ್ರಶ್ನೆಯೊಂದಿಗೆ ತೋರಿಸಲ್ಪಟ್ಟಿರುತ್ತದೆ. ಮ್ಯಾರೇಜ್ ಬ್ಯೂರೋಗಳಲ್ಲಿ ಅದೂ ನಮ್ಮ ಜಾತಿ ಸಮುದಾಯಕ್ಕೆ ಸೇರಿದ ಮ್ಯಾರೇಜ್ ಬ್ಯೂರೋದ ಫೈಲ್‌ನಲ್ಲಿ ಹುಡುಗಿಯ ವಿವರಗಳೊಂದಿಗೆ ಪಿನ್ ಹಾಕಲ್ಪಡುವಾಗ ರಿಜಿಸ್ಟ್ರೇಷನ್ ಹಣ ಪಾವತಿಸಿದ ರಸೀದಿ ಅಪ್ಪನ ಕೈಯಲ್ಲಿರುತ್ತದೆ. ಸುದ್ದಿ ಪತ್ರಿಕೆಗಳಲ್ಲಿ ಮ್ಯಾಟ್ರಿಮನಿ ಪೇಜ್‌ನಲ್ಲಿ ಜಾಹೀರಾತು ಕೊಟ್ಟದ್ದಕ್ಕೆ ಒಂದಿಷ್ಟು ಹಣ ಖರ್ಚಾದರೆ, ಮ್ಯಾಟ್ರಿಮನಿ ವೆಬ್‌ಸೈಟ್‌ಗಳಲ್ಲಿ ರಿಜಿಸ್ಟರ್ ಮಾಡಿ, ಸ್ವಲ್ಪ ದುಡ್ಡುತೆತ್ತು ಬೆಸ್ಟ್ ಪ್ರೊಫೈಲ್‌ಗಳನ್ನು ಹುಡುಕುವ ಕಾಯಕ ಆರಂಭವಾಗುತ್ತದೆ. ನಮ್ಮ ದೇಶದಲ್ಲಿ 1,267,401,849ಕ್ಕಿಂತಲೂ ಹೆಚ್ಚಿರುವ ಜನಸಂಖ್ಯೆಯಲ್ಲಿ ತಮ್ಮ ಮಗಳಿಗೆ ಯೋಗ್ಯವಾದ ಅವಿವಾಹಿತ ಹುಡುಗನೊಬ್ಬ ಸಿಗುತ್ತಿಲ್ಲವಲ್ಲಾ ಎಂದು ಹೆಣ್ಣು ಹೆತ್ತವರಿಗೆ ಬೇಸರ ಆವರಿಸುವುದು ಈ ಹೊತ್ತಲ್ಲೇ. ಅದರಲ್ಲೂ ನಮ್ಮ ದೇಶದಲ್ಲಿ ಮದ್ವೆಯಾಗುವುದು, ಮದ್ವೆ ಮಾಡಿಸುವುದು ಎಂದರೆ ಅಷ್ಟು ಸುಲಭದ ವಿಷಯವಲ್ಲ ಎಂಬುದು ಗೊತ್ತಿರುವ ವಿಷಯವೇ.

ಇತ್ತೀಚೆಗೆ ವಾಟ್ಸಾಪ್ ನಲ್ಲಿ ಬಂದ ಸಂದೇಶವೊಂದರಲ್ಲಿ If u want to know how divided we r, just look at matrimonial page of our newspaper – ಎಂಬ ಒನ್‌ಲೈನರ್ ನನ್ನ ಗಮನ ಸೆಳೆಯಿತು ಎಷ್ಟು ನಿಜ ಅಲ್ವಾ ಇದು. ನಾವೆಲ್ಲರೂ ಒಂದೇ ಎಂದು ಕೂಗಿ ಕೂಗಿ ಹೇಳುತ್ತೇವೆ. ಆದ್ರೆ ಮದ್ವೆ ವಿಷಯಕ್ಕೆ ಬಂದಾಗ ಮಾತ್ರ ಅಲ್ಲಿ ಜಾತಿ ಎದ್ದು ನಿಲ್ಲುತ್ತದೆ. ಪ್ರೀತಿಸುವಾಗ ಜಾತಿ ನೋಡದವರು ಮದ್ವೆ ವಿಷಯ ಬಂದ ಕೂಡಲೇ ಧರ್ಮ, ಜಾತಿ, ಉಪಜಾತಿಗಳ ಬಗ್ಗೆ ತಕರಾರು ಎತ್ತಲು ಶುರುಮಾಡುತ್ತಾರೆ. ಮ್ಯಾಟ್ರಿಮನಿ ಪೇಜ್‌ನಲ್ಲೇ ನೋಡಿ ಜಾತಿ ಜಾತಿಗೂ ಅಲ್ಲೊಂದು ಬಾಕ್ಸ್ ಇರುತ್ತದೆ. ಅದರೆಡೆಯಲ್ಲಿ ಕಾಸ್ಟ್ ನೋ ಬಾರ್ ಎಂದು ಬರೆದಿರುವ ಪ್ರೊಫೈಲ್ ಗಳೂ ಇರುತ್ತವೆ. ಇಂಥಾ ಪ್ರೊಫೈಲ್ ಕಣ್ಣಿಗೆ ಬಿದ್ದ ಕೂಡಲೇ ಅವನ್ಯಾಕೆ/ ಅವಳ್ಯಾಕೆ ಬೇರೆ ಜಾತಿಯವರನ್ನು ಮದ್ವೆ ಆಗುತ್ತಿದ್ದಾರೆ ಎಂಬ ಪ್ರಶ್ನೆಯೂ ಹುಟ್ಟಿಕೊಳ್ಳುತ್ತದೆ. ಏನೋ ಸಮಸ್ಯೆ ಇರಬೇಕು ಇಲ್ಲಾಂದ್ರೆ ಬೇರೆ ಜಾತಿಯ ಹುಡುಗ/ ಹುಡುಗಿಯನ್ನು ಹುಡುಕುವುದೇತಕ್ಕೆ ಎಂಬ ಯೋಚನೆಯೇ ಮೊದಲು ಬರುತ್ತದೆ ಬಿಟ್ರೆ ಆತ(ಆಕೆ) ಜಾತಿಯ ಪರದೆ ಸರಿಸಿ ಹೊರಗೆ ಬರುತ್ತಿದ್ದಾರೆ ಎಂಬುದನ್ನು ನಾವು ಯೋಚಿಸುವುದೇ ಇಲ್ಲ!

ಆದಾಗ್ಯೂ, ಅರೇಂಜ್ಡ್ ಮ್ಯಾರೇಜ್‌ಗಳಲ್ಲಿನ ಜಾತಿ ವಿಷಯ ಒಂದಾದರೆ ಲವ್ ಮ್ಯಾರೇಜ್‌ಗಳಲ್ಲಿ ಸಮಸ್ಯೆ ಹುಟ್ಟುಹಾಕುವುದೇ ಈ ಜಾತಿ. ಈ ಜಾತಿಯಿಂದಾಗಿ ಎಷ್ಟೋ ಪ್ರೇಮಿಗಳು ಆತ್ಮಹತ್ಯೆ ಮಾಡಿಕೊಂಡಿದ್ದಾರೆ, ಮದ್ವೆ ಮುರಿದು ಬಿದ್ದಿದೆ, ಮದ್ವೆ ಆಗದೇ ಉಳಿದುಕೊಂಡವರೂ ಇದ್ದಾರೆ, ಮರ್ಯಾದಾ ಹತ್ಯೆಗಳ ಸಂಖ್ಯೆಯೂ ಕಮ್ಮಿ ಏನಿಲ್ಲ. ಎಲ್ಲರ ವಿರುದ್ಧ ಕಟ್ಟಿಕೊಂಡು ಜಾತಿ ಧರ್ಮಗಳನ್ನು ಮೀರಿ ಪ್ರೀತಿಗೆ ಜೈ ಎಂದವರೂ ಇದ್ದಾರೆ. ಆದರೆ ನಮ್ಮ ಸಮಾಜದಲ್ಲಿ ಜಾತಿಯನ್ನು ಮೀರಿ ಬದುಕುವುದು ಸುಲಭದ ವಿಷಯವಂತೂ ಅಲ್ಲ. ನನಗ್ಯಾವ ಜಾತಿ ಇಲ್ಲ, ನಾನು ಮನುಷ್ಯ ಜಾತಿ ಎಂದು ಹೇಳಿ ನೋಡಿ, ಎಲ್ಲರೂ ಹುಬ್ಬೇರಿಸುತ್ತಾರೆ. ಇರುವುದೆರಡೇ ಜಾತಿ. ಒಂದು ಹೆಣ್ಣು ಒಂದು ಗಂಡು ಎಂದು ಪದೇ ಪದೇ ಹೇಳಿದರೂ ಈ ಎರಡು ಜಾತಿಗಳ ಮದ್ವೆ ಅಷ್ಟು ಸುಲಭದಲ್ಲಿ ಆಗುವುದಿಲ್ಲ. ಮದ್ವೆಗಳು ಅಷ್ಟೊಂದು ಸುಲಭದಲ್ಲಿ ಆಗುತ್ತಿದ್ದರೆ ಏನಾಗುತ್ತಿತ್ತು?

ಮದ್ವೆ ಆಗಲೇಬೇಕು…ಇಂದಲ್ಲದಿದ್ದರೆ ನಾಳೆ…ಆದರೆ ಷರತ್ತುಗಳು ಅನ್ವಯಿಸುತ್ತವೆ!

ಕೊಡುವುದೆಂದರೆ….

ನಿಮ್ಮ ಟಿಪ್ಪಣಿ ಬರೆಯಿರಿ

Image

ಗುರುಗಳೆಂದರು

ನಿನ್ನ ದಯೆ ತುಂಬಿದ ಕಣ್ಣುಗಳು

ಈ ನಾಜೂಕು ಬೆರಳುಗಳನ್ನು

ನನಗೆ ಕೊಡು

ನಾನಿದರಲ್ಲಿ ಕವಿತೆಯ ಅಗ್ನಿ

ಜ್ವಲಿಸುವಂತೆ ಮಾಡುವೆ

ನಾನು ಅವೆರಡನ್ನೂ ಕೊಟ್ಟೆ

ಅವರು ಅದರಲ್ಲಿ ತಳಮಳ

ವನ್ನೂ ಜೀವನದ

ನೋವನ್ನೂ ತುಂಬಿದರು

ವಿಪ್ಲವಕಾರಿಯೊಬ್ಬ ಹೇಳಿದ

ನಿನ್ನ ತುಂಬಿದ ಯೌವನ

ಬುದ್ಧಿಮತ್ತೆ, ಬಲವಾದ ಮೈಕಟ್ಟು

ನನಗೆ ಕೊಡು

ನಾನು ನಿನಗೆ ಸ್ವೇಚ್ಛೆಯನ್ನೂ

ಸ್ವಾತಂತ್ರ್ಯವನ್ನೂ ನೀಡುವೆ

ನಾನು ಅದೆಲ್ಲವನ್ನೂ ಕೊಟ್ಟೆ

ಅವರು ಅಧಿಕಾರದ ಲೋಕಲ್

ಕಮಿಟಿಯಲ್ಲಿ ಕಿತಾಪತಿ ಮಾಡಿ

ಕೊನೆಗೆ ಸಚಿವರಾದರು

ಪ್ರಿಯಕರ ಕೇಳಿದ

ಸ್ಫಟಿಕದಂತಿರುವ ನಿನ್ನ ಹೃದಯ

ಮುಗ್ಧ ಮಾತು,

ದಿಟ್ಟತನದ ನಿನ್ನ ಹೆಜ್ಜೆಗಳನ್ನು

ನನಗೆ ಕೊಟ್ಟು ಬಿಡು

ನಾನು ನಿನಗೆ ಪ್ರಣಯದ

ಸುಗಂಧವನ್ನೂ, ಸ್ನೇಹದ

ರಕ್ಷಣೆಯನ್ನೂ ನೀಡುವೆ

ನಾನವನಿಗೆ ಎಲ್ಲವನ್ನೂ ಕೊಟ್ಟೆ

ಆದರವನು ಎಲ್ಲ ಹುಡುಗಿಯ

ರೊಂದಿಗೆ ಚಕ್ಕಂದವಾಡುತ್ತಾ

ನನ್ನ ಹೃದಯವನ್ನು ಇನ್ನೊಬ್ಬಳೊಂದಿಗೆ

ಹೋಲಿಸಿ ನೋಡಿ

ಸಿಂಗಲ್ ಎಂದು ಸ್ಟೇಟಸ್ ಹಾಕಿ

ಮತ್ತೊಬ್ಬಳಿಗಾಗಿ ಅರಸುತ್ತಾ ನಡೆದ…

ಪಾಪದ ಹೂವು

1 ಟಿಪ್ಪಣಿ

ಆಷಾಢ ಮಾಸದ ಮಳೆ

ಯಂತೆ ಎಡೆಬಿಡದೆ

ಸುರಿದ ಕಷ್ಟಗಳು

ಮೈ ಮನವನ್ನು ಹರಿದು

ಚಿಂದಿಯಾಗಿ ಬಿಸಾಡಿದಾಗ

ಜನ ಕಣ್ಣು ಮುಚ್ಚಿ ನಕ್ಕಿದ್ದರು!

 

ಇರುಳಲ್ಲಿಯೂ, ಮರೆಯಲ್ಲಿಯೂ

ನನ್ನ ದೇಹ ಸುಖ ಅನುಭವಿಸ

ಬಂದವರು

ಹಗಲಲ್ಲಿ ಕಂಡಾಗ ಕಲ್ಲೆಸೆದರು

ದಿನಕೂಲಿ ಆಳುಗಳು

ಮಹಲಲ್ಲಿ ಕುಳಿತ ಮಹನೀಯರು

ನನ್ನ ದೇಹಕ್ಕೆ ಬೆಲೆ ಕಟ್ಟುತ್ತಾ

ಚೌಕಾಶಿ ಮಾಡಿದರು

 

ವ್ಯಾಪಾರವಲ್ಲವೇ?

ಮಾರುವವನಿಗೂ ಕೊಳ್ಳುವವನಿಗೂ

ಲಾಭವೇ ಬೇಕಿತ್ತು

ಬಿಗಿಯಾಗಿದ್ದ ನನ್ನ ರವಿಕೆಯ

ಕೊಂಡಿಗಳು ಅವರೆದುರು

ಕಳಚಿದರೆ

ಮಾತ್ರ ನನ್ನ ಕಂದಮ್ಮನಿಗೆ

ಕೈ ತುತ್ತು…

 

ಪಾಪವೋ ಪುಣ್ಯವೋ ನಾ ಕಾಣೆ

ಅವರ ಕಾಮದ ಹಸಿವಿಗೆ

ನಾ ಬೆಂದರೇನಂತೆ?

ಪಾಪುವಿನ ಹಸಿವು

ದೂರವಾಗಿತ್ತು.

 

ಸುಖ ಅನುಭವಿಸಿದವರ

ದೃಷ್ಟಿ ನನ್ನ ಕಂದಮ್ಮನ ಮೇಲೂ

ಬಿದ್ದಾಗ,

ನಡುಗಿದೆ

 

ನನ್ನ ಕೂಸು…

ವಯಸ್ಸು ಆರೇಳು

ಬಿಟ್ಟು ಬಿಡಿ ಎಂದು ಗೋಗರೆದೆ

ಉಹೂಂ…ರಕ್ಕಸರ ನರ್ತನ

ಕೈಗೆ ಸಿಕ್ಕಿದವಳು

ಅವಳು ಶವವಾದಳು

ನಾನು ಹುಚ್ಚಿಯಾದೆ…

 

ಅಲೆಮಾರಿಯಾದ ನನ್ನ

ಕಂಡ ಕಂಡವರೆಲ್ಲಾ ಸುಖಿಸಿದರು

ಬಿಟ್ಟಿಯಾಗಿ!

ಕತ್ತಲಿನ ಲೋಕದಲಿ

ನಾನೀಗ ಏಕಾಂಗಿ

 

ಕಣ್ತೆರೆದು ನೋಡಿದೆ

ಬೆಳಕು ಬಿದ್ದಿತ್ತು ಮುಖಕ್ಕೆ

ಕ್ಯಾಮೆರಾ, ಮೈಕ್ ಹಿಡಿದು

ನಿಂತಿದ್ದ ಆ ಜನರು

ಕರೆದೊಯ್ದರು

ನೇರ ಸ್ಟುಡಿಯೋಗೆ…

 

 

ಅವರ ವಾಹಿನಿಯಲ್ಲಿ

ಕ(ವ್ಯ)ಥೆ ಪ್ರಸಾರವಾಯ್ತು

ಸಾಂತ್ವನದ ಕರೆಗಳು

ಸಹಾಯದ ಹಸ್ತಗಳು

ಬಾಚಿ ತಬ್ಬಿದಾಗ

ಕಣ್ಮುಚ್ಚಿ ಕುಳಿತೆ

 

ಮೇಡಂ, ನಿಮಗೇನು ಅನಿಸುತ್ತಿದೆ?

ನಿರೂಪಕಿಯ ಪ್ರಶ್ನೆಗೆ ನಾನು

ಬೆಚ್ಚಿ, ಕಣ್ತೆರೆದೆ

 

ಟೀವಿ ಟಿಆರ್‌ಪಿ ಏರುತ್ತಲಿತ್ತು

ನಾನು ಕುಗ್ಗುತ್ತಾ ಹೋದೆ…

 

 

 

 

 

 

ಅವಳು ಮತ್ತೊಬ್ಬಳು! ಕೃತಿ ಬಿಡುಗಡೆ -ಆಮಂತ್ರಣ

1 ಟಿಪ್ಪಣಿ

rashmi

ಪ್ರಿಯರೇ,

2 ವರ್ಷಗಳ ಹಿಂದೆ ಕನ್ನಡಪ್ರಭ ‘ಚುಕ್ಕಿ’ ಪುರವಣಿಯಲ್ಲಿ ಸಾಧಕಿಯರ ಬಗ್ಗೆ ನಾನು ಬರೆದ ಲೇಖನಗಳನ್ನು ಇದೀಗ ಪುಸ್ತಕರೂಪದಲ್ಲಿ ಹೊರತರುತ್ತಿದ್ದೇನೆ.

ಕೃತಿ ಹೆಸರು ಅವಳು ಮತ್ತೊಬ್ಬಳು!.

ನಾನು ಪತ್ರಿಕೋದ್ಯಮಕ್ಕೆ ಕಾಲಿಟ್ಟು ಇದು ನಾಲ್ಕನೇ ವರ್ಷ. ಎರಡು ವರ್ಷಗಳ ಹಿಂದೆ ನನ್ನ ಚೊಚ್ಚಲ ಕವನ ಸಂಕಲನ “ನೆನಪಿನ ಮಳೆಯಲ್ಲಿ” ಬಿಡುಗಡೆಯಾಗಿತ್ತು. ಇದೀಗ ನನ್ನ ಎರಡನೇ  ಕೃತಿ “ಅವಳು ಮತ್ತೊಬ್ಬಳು” ಲೋಕಾರ್ಪಣೆಗೆ ಸಿದ್ಧವಾಗಿದೆ.

ಡಿಸೆಂಬರ್ 9 ಭಾನುವಾರ ಬೆಳಗ್ಗೆ 10.30ಕ್ಕೆ ಕನ್ನಡ ಸಾಹಿತ್ಯ ಪರಿಷತ್ತಿನಲ್ಲಿ ಅವಳು ಮತ್ತೊಬ್ಬಳು ಕೃತಿಯನ್ನು ನಟಿ ನೀತೂ ಲೋಕಾರ್ಪಣೆ ಮಾಡಲಿದ್ದಾರೆ.

ನನ್ನ ಈ ಕಾರ್ಯಕ್ರಮಕ್ಕೆ ನೀವೆಲ್ಲರೂ ಬರಬೇಕು…ನಿಮ್ಮ ಹಾರೈಕೆ ನನ್ನೊಂದಿಗಿರಲಿ…

ಭಾನುವಾರ ಕ.ಸಾ.ಪದಲ್ಲಿ ನಿಮ್ಮನ್ನು ಕಾಯುತ್ತಿರುತ್ತೇನೆ…ನೀವು ಬರಲೇಬೇಕು…

-ರಶ್ಮಿ ಕಾಸರಗೋಡು.

ಅಪ್ಪನ ಮಗಳಿಂದ ಅಮ್ಮನಿಗೊಂದು ಪತ್ರ…

5 ಟಿಪ್ಪಣಿಗಳು

ಪ್ರೀತಿಯ ಅಮ್ಮ…,

ಹೇಗಿದ್ದೀಯಾ? ಎಂದು ಕೇಳಲ್ಲ…ಯಾಕೆಂದ್ರೆ ದಿನಾ ಎರಡು ಹೊತ್ತು ಫೋನಿನಲ್ಲಿ ಹರಟುವವರು ನಾವು. ಫೋನ್ ರಿಸೀವ್ ಮಾಡಿದ ಕೂಡಲೇ ನೀನು ಕೇಳುವ ಮೊದಲ ಪ್ರಶ್ನೆ ತಿಂಡಿ ತಿಂದ್ಯಾ? ಬಹುಷಃ ಎಲ್ಲ ಅಮ್ಮಂದಿರು ತಮ್ಮ ಮಕ್ಕಳಲ್ಲಿ ಇದೇ ಪ್ರಶ್ನೆಯ ಮೂಲಕ ಸಂಭಾಷಣೆಗೆ ಮುನ್ನುಡಿ ಹಾಕ್ತಾರೆ ಅಲ್ವಾ?

ನಿನಗೆ ಗೊತ್ತಿದ್ದಂಗೆ ನಾನು ನಿನ್ನಲ್ಲಿ ಮುಚ್ಚಿಟ್ಟ ವಿಷಯವೇ ಇರಲಿಕ್ಕಿಲ್ಲ. ಯಾಕೆಂದರೆ ಆಫೀಸು, ಪಿಜಿ, ಬಿಎಂಟಿಸಿ ಬಸ್ಸು, ನನ್ನ ಗೆಳೆಯರು, ಫೇಸ್್ಬುಕ್ ಕಾಮೆಂಟ್್ಗಳು, ಬ್ಲಾಗು..ಎಲ್ಲದರ ಬಗ್ಗೆಯೂ ಈಗಾಗಲೇ ಹೇಳಿಯಾಗಿದೆ. ಆಫೀಸಿನಿಂದ ಪಿಜಿಗೆ ಬಂದು  ಫೋನ್ ಕೈಗೆತ್ತಿಕೊಂಡಾಗೆಲ್ಲಾ, ನನ್ನ ರೂಮ್್ಮೇಟ್ಸ್್ಗಳು…” ಇವತ್ತಿನ ವಿಷಯ ಎಲ್ಲ ಬೇಗ ಅಪ್್ಡೇಟ್ ಮಾಡು” ಎಂದು ತಮಾಷೆಯಾಗಿ ಹೇಳಿದರೆ, ಇನ್ನು ಕೆಲವೊಮ್ಮೆ, ನಾವು ಹೇಳಿದ್ದನ್ನೆಲ್ಲಾ ಅಮ್ಮನಲ್ಲಿ ಊದ್ಬೇಡ …ಎಂಬ ಎಚ್ಚರಿಕೆ ನೀಡುವುದೂ ಉಂಟು. ಅವರು ಹೀಗೆ ಹೇಳುವುದಕ್ಕೆ ಕಾರಣವೂ ಇದೆ.

ಇದೀಗ ನಾನು ಮತ್ತು ನೀನು ಬೆಸ್ಟ್್ಫ್ರೆಂಡ್ಸ್!. ಹೌದು, ‘ಇದೀಗ’ ಅಂತ ಇಲ್ಲಿ ಹೇಳಲೇ ಬೇಕಾಗಿದೆ. ಯಾಕೆಂದ್ರೆ ಅಮ್ಮ..ನಾನು ನೀನು ತುಂಬಾ ಹತ್ತಿರವಾಗಿದ್ದು ನಾನು ಹೈಸ್ಕೂಲ್ ಮೆಟ್ಟಿಲು ಹತ್ತಿದಾಗಲೇ. ಅಲ್ಲಿಯವರೆಗೆ ಎಲ್ಲವನ್ನೂ ಪಪ್ಪನಲ್ಲೇ ಹೇಳುತ್ತಿದ್ದ ನಾನು, ದೊಡ್ಡವಳಾಗುತ್ತಿದ್ದಂತೆ ನಿನ್ನತ್ತ ವಾಲ ತೊಡಗಿದೆ. ನಿಜ ಹೇಳಲಾ ಅಮ್ಮ… ಚಿಕ್ಕಂದಿನಲ್ಲಿ ತಮ್ಮನನ್ನೇ ನೀನು ಜಾಸ್ತಿ ಮುದ್ದು ಮಾಡುತ್ತಿದ್ದರೆ, ನನಗೆ ಹೊಟ್ಟೆ ಉರಿ ಆಗ್ತಿತ್ತು. ನಿನಗೆ ನನ್ನ ಮೇಲೆ ಪ್ರೀತಿನೇ ಇಲ್ಲ ಎಂದೇ ಅಂದ್ಕೊಂಡಿದ್ದೆ. ಆದರೆ ನೀನು ನನ್ನದೇ ಕಲರು, ನೀನೇ ನನಗೆ ಹೆಚ್ಚು ಪ್ರೀತಿ ಎಂದು ಮುತ್ತಿಡುತ್ತಾ ಮುದ್ದಿಸುತ್ತಿದ್ದುದು, ಸ್ನಾನ ಮಾಡಿಸಿದ್ದು, ಎದೆಗವುಚಿ ಮಲಗಿದ್ದು ಎಲ್ಲವೂ ಪಪ್ಪನೇ. ಅದಕ್ಕೇ ನನಗೆ ಪಪ್ಪನ ಮೇಲೆ ತುಂಬಾ ಪ್ರೀತಿ. ನೀನು ಅಣ್ಣನಿಗೆ ಬೈಯ್ಯುವಾಗ, ತಮ್ಮನಿಗೆ ಎರಡು ಬಾರಿಸುವಾಗೆಲ್ಲಾ ನಿನ್ನ ಮೇಲಿನ ಭಯ ಇನ್ನೂ ಹೆಚ್ಚಾಗುತ್ತಿತ್ತು. ನಿಂಗೊತ್ತಾ, ಅಕ್ಕ ಹಾಸ್ಟೆಲ್್ನಲ್ಲಿದ್ದಾಳೆಂದು ಅವಳು ರಜೆಯಲ್ಲಿ ಮನೆಗೆ ಬಂದಾಗೆಲ್ಲಾ ಅವಳನ್ನು ತುಂಬಾ ಮುದ್ದಿಸುತ್ತಿದ್ದೆ. ಆವಾಗೆಲ್ಲಾ ನನಗೂ ಹಾಸ್ಟೆಲ್್ಗೆ ಹೋಗಬೇಕು ಎಂದು ಅನಿಸ್ತಾ ಇತ್ತು. ಹಾಸ್ಟೆಲ್ ಜೀವನ ನನಗಿಷ್ಟ ಎಂದಲ್ಲ…ನೀನು ನನ್ನನ್ನು ಮುದ್ದು ಮಾಡಬೇಕಿತ್ತು ಅಷ್ಟೇ. ಆದ್ರೆ ಪಪ್ಪನಿಂದ ದೂರ ಇರುವ ಶಕ್ತಿಯೂ ಇರಲಿಲ್ಲ. ಶಾಲೆಯಲ್ಲಿ ನನ್ನ ಗೆಳತಿಯರೆಲ್ಲರೂ ನನ್ ಅಪ್ಪನಿಗೆ ತುಂಬಾ ಕೋಪ ಜಾಸ್ತಿ, ಅಪ್ಪ ಬೈತಾರೆ ಆದ್ರೆ ಅಮ್ಮ ಏನು ಹೇಳಲ್ಲ ಎಂದು ಅವರಮ್ಮನ ಬಗ್ಗೆ ಹೇಳಿದಾಗೆಲ್ಲಾ ನನಗೆ ಬೇಜಾರಾಗುತ್ತಿತ್ತು. ಆದರೇನು ನನ್ನ ಪಪ್ಪ ನಿಮ್ಮಪ್ಪನಂತೆ ಅಲ್ಲ… ನನ್ ಪಪ್ಪನಲ್ಲಿ ಏನು ಬೇಕಾದರೂ ಹೇಳಬಹುದು, ನನ್ನಪ್ಪ ಬೈದಿಲ್ಲ…ಈವರೆಗೆ ಒಂದೇ ಒಂದು ಏಟು ಕೊಟ್ಟಿಲ್ಲ ಎಂದು ಹೇಳುತ್ತಾ ‘ನಾನು ಪಪ್ಪನ ಮಗಳಾಗಿ’ ಬಿಡುತ್ತಿದೆ.

ಇನ್ನು, ಶಾಲಾ ದಿನಗಳಲ್ಲಿ ರಜೆ ಸಿಕ್ಕಿದರೆ ಸಾಕು, ನೀನು ನನಗೆ ಆ ಕೆಲ್ಸ ಮಾಡು, ಈ ಕೆಲ್ಸ ಮಾಡು ಎಂದು ಯಾವತ್ತೂ ಆಜ್ಞಾಪಿಸಿಲ್ಲ. ಆದರೂ ನಾನೇ ಮನೆಗೆಲಸ ಮಾಡುತ್ತಿದ್ದೆ ಯಾಕೆ ಗೊತ್ತಾ? ಚೆನ್ನಾಗಿ ಕೆಲ್ಸ ಮಾಡಿದರೆ ನೀನು ನನ್ನನ್ನು ಹೊಗಳುತ್ತಿದ್ದೆ. ತುಂಬಾ ಚುರುಕಾಗಿ ಕೆಲ್ಸ ಮಾಡ್ತಾಳೆ ಮಗಳು…ಅವಳಗಿಂತ (ಅಕ್ಕನಿಗಿಂತ) ಇವಳೇ ಸ್ಮಾರ್ಟು, ನನ್ ತರಾನೇ ಎಂದು ನೀನು ಪಪ್ಪನಿಗೆ ಹೇಳುವಾಗೆಲ್ಲಾ ನಾನೆಷ್ಟು ಖುಷಿ ಪಟ್ಟಿದ್ದೆ ಗೊತ್ತಾ? ನಿನ್ನಂತೆಯೇ ಸೊಂಟದಲ್ಲಿ ಕೊಡಪಾನ ಇಟ್ಟು ಬೇಗ ಬೇಗ ನಡೆಯಬೇಕು, ಹತ್ತೇ ನಿಮಿಷದಲ್ಲಿ ಅಂಗಳ ಗುಡಿಸ್ಬೇಕು, ನೀಟಾಗಿ ನೆಲ ಉಜ್ಜಬೇಕು, ಎಲ್ಲವನ್ನೂ ಫಟಾಫಟ್ ಮಾಡಿ ಮುಗಿಸಬೇಕು….ಹೀಗೆ ಎಲ್ಲವನ್ನೂ ಬೇಗನೆ ಕಲಿತದ್ದು ನಿನ್ನ ಮೆಚ್ಚುಗೆಯ ಮಾತು ಕೇಳಲು ಮಾತ್ರ!.

ಇಷ್ಟು ಮಾತ್ರವಲ್ಲ, ಬರವಣಿಗೆಯ ವಿಷ್ಯದಲ್ಲೂ ಅಷ್ಟೇ. ನನಗಿಂತ ಹೆಚ್ಚು ಪುಸ್ತಕಗಳನ್ನೋದಿದವಳು ನೀನು. ಆದ್ದರಿಂದಲೇ ಚೆನ್ನಾಗಿ ಬರೀಬೇಕು ಅಂದ್ರೆ ಕನ್ನಡ ಪುಸ್ತಕ ಓದು, ಕನ್ನಡ ಸಾಹಿತ್ಯ ಅರಿತುಕೋ ಎಂದು ಸಲಹೆ ನೀಡುತ್ತಿದ್ದೆ. ಇತ್ತ, ನೀನು ಬರೆದ ಕವಿತೆಗಳನ್ನು ಮಾತ್ರ ಅಡಗಿಸಿಟ್ಟಿರುತ್ತಿದ್ದೆ. ನಿನ್ನ ಕವಿತೆಗಳನ್ನೋದಿದರೆ ಅದರಲ್ಲಿ ವಿಷಾದ ಭಾವ….ಮುಚ್ಚಿಟ್ಟಿದ್ದ ನೋವಿನ ಅನುಭವ…ಏನೋ ಹಂಬಲಿಕೆ ಎದ್ದು ಕಾಣುತ್ತಿತ್ತು. ಇದೇನು? ಎಂದು ಕೇಳಿದರೆ…ಹೀಗೆ ಸುಮ್ಮನೆ ಬರೆದೆ ಎಂದು ನಕ್ಕು ಅಡುಗೆ ಮನೆಗೆ ನಡೆಯುತ್ತಿದ್ದೆ.

ಅಮ್ಮಾ…ನಂಗೊತ್ತು. ನೀನು ಕೂಡಾ ಜೀವನದಲ್ಲಿ ಸಾಧನೆ ಮಾಡಬೇಕೆಂದು ತುಂಬಾ ಆಸೆ ಪಟ್ಟಿದ್ದೆ ಅಲ್ವಾ. ನೀನೇ ಹೇಳಿದ್ದೆ, ನನಗೆ ನರ್ಸ್ ಆಗ್ಬೇಕು ಎಂಬ ಕನಸು ಇತ್ತು ಅಂತಾ. ನಿನ್ನ ಕನಸು ಕೈಗೂಡಲೇ ಇಲ್ಲ. ಹೋಗಲಿ ಬಿಡು, ನಾವಿಬ್ಬರು (ಅಕ್ಕ ಮತ್ತು ನಾನು) ಡಾಕ್ಟರ್ ಆಗ್ಬೇಕು ಎಂದು ಬಯಸಿದ್ದೆ. ಅವಳು ನನಗೆ ಸಯನ್ಸೇ ಬೇಡ ಎಂದು ಕಾಮರ್ಸ್ ಆಯ್ದು ಕೊಂಡಾಗ, ನೀನೆ ಹೇಳಿದ್ದೆ, ನೀನಾದರೂ ಸಯನ್ಸ್ ಆಯ್ಕೆ ಮಾಡು ಎಂದು. ನನಗೂ ಸಯನ್ಸ್ ಇಷ್ಟ ಇತ್ತು, ಆಯ್ಕೆ ಮಾಡಿದೆ. ನಂತರ ಪ್ರವೇಶ ಪರೀಕ್ಷೆ ಬರೆದು ಫಲಿತಾಂಶವೂ ಬಂತು. ಡಾಕ್ಟರ್ ಆಗೋಕೆ ಸಾಧ್ಯವಿಲ್ಲ, ರ್ಯಾಂಕ್ ಜಾಸ್ತಿ ಇದೆ ಎಂದು ಅಕ್ಕ ರಿಸಲ್ಟ್ ಹೇಳಿದಾಗ ನಿನ್ನ ಮುಖ ಬಾಡಿತ್ತು. ಹೇಗೋ ಇಂಜಿನಿಯರಿಂಗ್ ಸೀಟು ಸಿಕ್ಕಾಗ, 4 ವರ್ಷದಲ್ಲಿ ನಾನು ಇಂಜಿನಿಯರ್ ಆಗ್ತೀನಿ ಎಂದು ನೀನು ಕನಸು ಕಂಡಿದ್ದೆ. ಆವಾಗಲೇ ನನ್ನ ಮನಸ್ಸು ಪತ್ರಿಕೋದ್ಯಮದತ್ತ ವಾಲಿತ್ತು. ನಾನು ಆಶಿಸಿದಂತೆ ಅದೇ ಕ್ಷೇತ್ರಕ್ಕೆ ನಾನು ಕಾಲಿಟ್ಟೆ. ನನ್ನ ಈ ಆಯ್ಕೆಯಿಂದ ನಿನಗೆ ಬೇಜಾರಾಗಿರಬಹುದು. ಆದರೆ ನೀನು, ನಿನಗೆ ಖುಷಿ ಯಾವುದರಲ್ಲಿದೆಯೋ, ಅದೇ ಕೆಲ್ಸ ಮಾಡು ಎಂದು ಬೆನ್ನು ತಟ್ಟಿದೆ. ನಾನು ಬಿದ್ದಾಗೆಲ್ಲಾ…ನೀನು ಸೋತು ಹಿಂದೆ ಬರ್ಬೇಡ. ಜೀವನ ಅಂದ್ರೆ ಇದೆಲ್ಲಾ ಮಾಮೂಲಿ. ದೇವ್ರು ಇದ್ದಾನೆ. ಅವ್ನು ಕೈ ಬಿಡಲ್ಲ ಎಂದು ಹೇಳ್ತಿದ್ದೆ. ನನಗೆ ಬೇಜಾರಾದಾಗೆಲ್ಲಾ ನಿನ್ನಲ್ಲಿ ಹೇಳ್ತೀನಿ, ಆದ್ರೆ ನೀನು….ನನ್ನ ಬೇಸರವನ್ನು ನಿನ್ನಲ್ಲಿ ಹೇಳಿ ನಿನ್ನನ್ನು ಬೇಜಾರು ಮಾಡೋಕೆ ಇಷ್ಟವಿಲ್ಲ ಪುಟ್ಟಾ ಎಂದು ಹೇಳ್ತೀಯಾ.

ಅಮ್ಮ, ಕಾಲ ಬದಲಾಗುತ್ತಾ ಹೋದಂತೆ ನೀನು ನಾನು ಇಬ್ಬರೂ ಬದಲಾಗಿದ್ದೀವಿ. ಪರಿಸ್ಥಿತಿಯನ್ನು ಅರ್ಥ ಮಾಡಿಕೊಂಡು ಸವಾಲುಗಳನ್ನು ಎದುರಿಸುವಷ್ಟು ಪಕ್ವತೆ ನನಗೂ ಬಂದಿದೆ. ಇದೆಲ್ಲಾ ಸಾಧ್ಯವಾದುದು ನಿನ್ನಿಂದಲೇ. ನಾನು ಸೋತು ಕಣ್ಣೀರಿಟ್ಟಾಗ, ನೀನು ಸಾಗಬೇಕಾದ ದಾರಿ ಇನ್ನೂ ಇದೆ, ಮತ್ತೆ ಮತ್ತೆ ಪ್ರಯತ್ನಿಸು ಎಂದು ಹೇಳಿ ಧೈರ್ಯ ತುಂಬಿದ್ದಿ ಅಲ್ವಾ…ನಿನ್ನಂತ ಅಮ್ಮ ನನ್ನ ಜತೆ ಇದ್ದರೆ ಇನ್ನೇನು ಬೇಕು ಹೇಳು?

ಈ ಪತ್ರ ಓದಿದ ನಂತರ ನೀನು ಇಮೋಷನಲ್ ಆಗ್ತಿ ಅಂತ ಗೊತ್ತಿತ್ತು…ಆದ್ರೆ ಪ್ಲೀಸ್…ಕಣ್ಣೀರು ಹಾಕ್ಬೇಡ…

ನಿನಗೊತ್ತಲ್ವಾ ನನಗೆ ಮಳೆ ಎಂದರೆ ಪಂಚಪ್ರಾಣ ಅಂತ. ಚಿಕ್ಕವಳಿದ್ದಾಗ ನನಗೆ ಮಳೆಯಲ್ಲಿ ಆಟವಾಡುವಾಸೆ. ಆವಾಗ ನೀನು..ಮಳೆ ನೆನೆದರೆ ಜ್ವರ ಬರುತ್ತೆ…ಮತ್ತೆ ಶಾಲೆಗೆ ರಜೆ ಹಾಕ್ಬೇಕು. ನೀನು ಕಲಿತು ಒಳ್ಳೆಯ ಕೆಲ್ಸ ಸಿಕ್ಕಿದ ನಂತರ ಮಳೆಯಲ್ಲಿ ನೆನೆದರೆ ನಾನು ಏನೂ ಹೇಳಲ್ಲ ಅಂತಿದ್ದೆ…

ಹಾಗಾದರೆ ನಾನೀಗ ಮಳೆಯಲ್ಲಿ ನೆನೆಯಬಹುದು ಅಲ್ವಾ….

ಗಾಬರಿ ಆಗ್ಬೇಡಮ್ಮಾ…ನಿನ್ನ ಮೂಡ್ ಚೇಂಜ್ ಮಾಡುವುದಕ್ಕೋಸ್ಕರ ಹೇಳಿದೆ ಅಷ್ಟೇ…

ನಾನು ಮಳೆಯಲ್ಲಿ ನೆನೆಯೋಲ್ಲಪ್ಪಾ….ಪ್ರಾಮಿಸ್….

ಅಮ್ಮಾ…ಕೊನೆಯದ್ದಾಗಿ ಒಂದು ಮಾತು..

ಈ ಮೊದಲು ನಿನ್ನನ್ನು ಅರ್ಥ ಮಾಡಿಕೊಳ್ಳದೇ ನನ್ನಮ್ಮ ತುಂಬಾ ‘ಜೋರು’ ಎಂದು ಮನಸ್ಸಲ್ಲೇ ಅಂದ್ಕೊಂಡಿದ್ದಕ್ಕೆ ಕ್ಷಮೆ ಇರಲಿ…

ಲವ್ ಯು ಅಮ್ಮಾ…

ಇತೀ,

ನಿನ್ನ ಅಮ್ಮಿ

ಗಲ್ಪ್ ರಾಷ್ಟ್ರಗಳಲ್ಲಿ ದುಡಿವ ‘ನಮ್ಮವರ’ ಬದುಕಿನ ಚಿತ್ರಣ – ಗದ್ದಾಮ

2 ಟಿಪ್ಪಣಿಗಳು

ಗದ್ದಾಮ(2011)ಗದ್ದಾಮ  (ಖದ್ದಾಮ)-ಅಂದರೆ ಅರೇಬಿಕ್ ನಲ್ಲಿ ಕೆಲಸದಾಕೆ ಎಂದಥ೯. ಕೇರಳದ ಮಲೆಯಾಳಿಗಳಿಗೆ ಗಲ್ಫ್ ಅಂದ್ರೆ ಅದೇನೋ ಸೆಳೆತ. ಕೇರಳಿಗರು ಗಲ್ಪ್  ಗೆ ಹೋಗುವುದೆಂದರೆ ನಾವು ಬೆಂಗಳೂರಿನಿಂದ ಕೆಂಗೇರಿಗೆ ಹೋದಷ್ಟೇ ಸಲೀಸು. ಅಲ್ಲಿ ಯಾವುದೇ ಚಿಕ್ಕ ಪುಟ್ಟ ಕೆಲಸ ಆದ್ರೂನು ಸೈ, ಗಲ್ಫ್ ನಲ್ಲಿ ಕೆಲಸ ಸಿಕ್ಕಿದರೆ ಸಾಕು ಇಲ್ಲಿಯವರ ಬದುಕು ಹಸನುಗೊಳ್ಳುತ್ತದೆ. ಆದರೆ ದೂರದ ಮರುಭೂಮಿ ನಾಡಲ್ಲಿ  ನಮ್ಮವರು ಎಷ್ಟೊಂದು ಕಷ್ಟಪಟ್ಟು ಜೀವನ ಸಾಗಿಸುತ್ತಾರೆ ಎಂಬುದು ಅವರಿಗಷ್ಟೇ ಗೊತ್ತು.ಇಂತಹ ಸತ್ಯ ಕಥೆಗಳನ್ನು ಆಧರಿಸಿ ಕಮಲ್ ನಿಮಿ೯ಸಿದ ಮಲಯಾಳಂ ಚಿತ್ರವೇ ಗದ್ದಾಮ(2011).

ಪಟ್ಟಾಂಬಿ ಮೂಲದ ಹಳ್ಳಿಯ ಮುಗ್ಧ ಹೆಣ್ಣು ಮಗಳು ಅಶ್ವತಿ. ಮನೆಯಲ್ಲಿ ಕಿತ್ತು ತಿನ್ನುವ ಬಡತನ. ಹತ್ತಿರದ ಉಪ್ಪಿನಕಾಯಿ ಫ್ಯಾಕ್ಟರಿಯಲ್ಲಿ ಕೆಲಸ ಮಾಡಿ ಅಪ್ಪನ ಸಾಲ ತೀರಿಸಬೇಕು, ಮನೆಯ ಖಚೂ೯ ಭರಿಸಬೇಕು. ಹೀಗಿರುವಾಗ ಜೆಸಿಬಿ ಡ್ರೈವರ್ ಆಗಿರುವ ರಾಧಾಕೃಷ್ಣನ್ ಅಶ್ವತಿಯನ್ನು ಮದುವೆಯಾಗಲು ಮುಂದಾಗುತ್ತಾನೆ. ಮದ್ಯಪಾನ , ಗೂಂಡಾಗಿರಿ ನಿಲ್ಲಿಸಿದರೆ ತಾನು ನಿನ್ನನ್ನು ಮದುವೆಯಾಗುವುದಾಗಿ ಹೆಣ್ಣು ನೋಡಲು ಬಂದ ರಾಧಾಕಷ್ಣನ್ ಗೆ ಅಶ್ವತಿ ಹೇಳುತ್ತಾಳೆ. ಇದಕ್ಕೆಲ್ಲಾ ಒಪ್ಪಿದ ರಾಧಾಕಷ್ಣನ್ ಅಶ್ವತಿಯನ್ನು ಮದುವೆಯಾಗುತ್ತಾನೆ. ಮದುವೆಯಾದ ನಂತರ ಇವರ ಸಂಸಾರ ಚೆನ್ನಾಗಿಯೇ ಇರುತ್ತದೆ. ಮುಂದೊಂದು ದಿನ ರಾಧಾಕೃಷ್ಣನ್ ನೀರಿಗೆ ಬಿದ್ದು ಸಾವನ್ನಪ್ಪುತ್ತಾನೆ. ಮನೆಯ ಆಥಿ೯ಕ ಪರಿಸ್ಥಿತಿ ತೀರಾ ಹದಗೆಟ್ಟಿರುತ್ತದೆ. ಹೀಗಿರುವಾಗ ಗಲ್ಪ್ ನಲ್ಲಿ ಮನೆಕೆಲಸದಾಕೆಯಾಗಿ ಸೇರಿಕೊಂಡರೆ ಒಳ್ಳೆಯ ಸಂಬಳ ಸಿಗಬಹುದು ಎಂದು ಊರಿನ ಜನ ಸಲಹೆ ನೀಡುತ್ತಾರೆ. ಗಲ್ಫ್ ನಲ್ಲಿ ಟ್ಯಾಕ್ಸಿ ಡ್ರೈವರ್ ಆಗಿರುವ ಉಸ್ಮಾನ್ ಅಶ್ವತಿಯ ಗ್ರಾಮದವನೇ. ವಿಸಾದ ಏಪಾ೯ಟು ಮಾಡಿದ ಉಸ್ಮಾನ್  ದೊರೆಯೊಬ್ಬರ ಮನೆಯಲ್ಲಿ ಅಶ್ವತಿಗೆ ಕೆಲಸ ಕೊಡಿಸಲು ಒಪ್ಪಿಕೊಳ್ಳುತ್ತಾನೆ. ಮನೆಯಲ್ಲಿನ ಪರಿಸ್ಥಿತಿ ಮನಗಂಡ ಅಶ್ವತಿ ಒಲ್ಲದ ಮನಸ್ಸಿನಿಂದಲೇ ಗಲ್ಫ್ ರಾಷ್ಟ್ರಕ್ಕೆ ಪ್ರಯಾಣ ಬೆಳೆಸುತ್ತಾಳೆ.

 
ಗಲ್ಫ್  ತಲುಪಿದ ಕೂಡಲೇ ವಿಮಾನ ನಿಲ್ದಾಣದಲ್ಲಿನ ಅನುಭವವೂ ಆಕೆಯಲ್ಲಿ ಅಚ್ಚರಿ ಮೂಡಿಸುತ್ತವೆ. ಚಂದನದ ಅಡ್ಡನಾಮ ಹಾಕಿ ತನ್ನ ಪ್ರಾಯೋಜಕರಿಗಾಗಿ ಕಾಯುತ್ತಾ ಕುಳಿತಿದ್ದ ಅಶ್ವತಿಯನ್ನು ಮುಸ್ಲಿಮ್ ಹೆಂಗಸೊಬ್ಬಳು  ಮಾತನಾಡಿಸುತ್ತಾಳೆ. ಆಕೆಯೂ ಕೇರಳದವಳೇ ಆಗಿದ್ದು, ಗಲ್ಫ್ ನಲ್ಲಿ ಬುಖಾ೯ ಹಾಕದಿದ್ದರೆ ಬದುಕುವುದು ಸಾಧ್ಯವೇ ಇಲ್ಲ ಎಂದು ಹೇಳಿ ಕಪ್ಪು ದುಪಟ್ಟಾವನ್ನು ತಲೆಗೆ ಹಾಕಿಕೊಳ್ಳುವಂತೆ ಅಶ್ವತಿಗೆ ಹೇಳುತ್ತಾಳೆ. ಚಂದನದ ನಾಮವನ್ನು ಉಜ್ಜಿ ಅಶ್ವಿತಿ ಕಪ್ಪು ದುಪ್ಪಟ್ಟಾ ತಲೆಗೆ ಹಾಕಿಕೊಳ್ಳುತ್ತಾಳೆ. ಉಸ್ಮಾನ್ ಮತ್ತು ಆತನ ಅರಬ್ಬೀ ದೊರೆ ವಿಮಾನ ನಿಲ್ದಾಣದಿಂದ ಅಶ್ವತಿಯನ್ನು ಕರೆದೊಯ್ಯಲು ಬರುತ್ತಾರೆ. ದೊರೆಯ ಮನೆಗೆ ಕಾರಿನಲ್ಲಿ ಸಾಗುತ್ತಿರುವಾಗ ಉಸ್ಮಾನ್ ಅಶ್ವತಿಯಲ್ಲಿ, “ಸಹೋದರಿ.. ಈಗಲೇ ಈ ಹೊರ ಪ್ರಪಂಚವನ್ನು ಕಣ್ತುಂಬ ನೋಡಿಕೋ, ಮುಂದೆ ಇಂತಹ ಅವಕಾಶ ಸಿಗುವುದಿಲ್ಲ” ಎಂದು ಹೇಳುತ್ತಿದ್ದರೂ, ಮುಂದೆ ತನ್ನ ಜೀವನದಲ್ಲಿ ಇಷ್ಟೊಂದು ಕಷ್ಟಗಳು ಬರಲಿವೆ ಎಂದು ಅಶ್ವತಿ ಯೋಚಿಸಿರಲಿಲ್ಲ.
ಪ್ರಾಯೋಜಕರ ಮನೆಗೆ ತಲುಪಿದ ಅಶ್ವತಿಗೆ ಅಲ್ಲಿನ ಅನುಭವಗಳು ಬೆಚ್ಚಿ ಬೀಳಿಸುವಂತಿರುತ್ತವೆ. ಅವರು ಹೇಳುವ ಭಾಷೆ ಇವಳಿಗೆ ಅಥ೯ವಾಗುತ್ತಿಲ್ಲ. ಆದರೂ ಕೆಲವೊಂದು ಪದಗಳನ್ನು ಊಹಿಸಿಕೊಂಡು ಅಶ್ವತಿ ಎಲ್ಲದಕ್ಕೂ ತಲೆಯಾಡಿಸುತ್ತಿರುತ್ತಾಳೆ. ಅದೇ ಮನೆಯಲ್ಲಿ ಫಾತಿಮಾ ಎಂಬ ಇಂಡೋನೇಷ್ಯಾ ಮೂಲದ ಹುಡುಗಿಯೂ ಕೆಲಸಕ್ಕಿರುತ್ತಾಳೆ. ಅಶ್ವತಿಯಲ್ಲಿ ಇನ್ನು ಮುಂದೆ ಇದೇ ಉಡುಪು ಧರಿಸಬೇಕು ಎಂದು ಬುಖಾ೯  ಧರಿಸುವಂತೆ ಫಾತಿಮಾ ಹೇಳಿಕೊಡುತ್ತಾಳೆ. ಈ ಸೀರೆ ನಿನಗೆ ಚೆನ್ನಾಗಿ ಒಪ್ಪುತ್ತದೆ. ನಾನು ಹಿಂದೀ ಮೂವಿಯಲ್ಲಿ ಸೀರೆ ನೋಡಿದ್ದೇನೆ ಎಂದು ಅರ್ಧಂಬರ್ಧ ಇಂಗ್ಲಿಷ್  ಮಾತನಾಡುವ ಫಾತಿಮಾ ಅಶ್ವತಿಯ ಜತೆಯಾಗುತ್ತಾಳೆ.
ಆ ಮನೆಯಲ್ಲಿರುವ ಹೆಂಗಸರು ಆ ಕೆಲಸ ಮಾಡು ಈ ಕೆಲಸ ಮಾಡು ಎಂದು ಆದೇಶ ನೀಡುವವರೇ. ಗಂಡಸರಿಗೆ ಈಕೆಯ ಮೈಮೇಲೆಯೇ ಕಣ್ಣು. ಹೇಗೋ ಎಲ್ಲವನ್ನು ಸಹಿಸಿಕೊಂಡು ಹೋಗಬೇಕು. ಇಲ್ಲದಿದ್ದರೆ ಮನೆಯಲ್ಲಿನ ಪರಿಸ್ಥಿತಿ ಇನ್ನೂ ಹದಗೆಡುತ್ತದೆ ಎಂಬ ಚಿಂತೆ. ಹೀಗೆ ಮನೆಕೆಲಸದಲ್ಲಿ ನಿರತಳಾಗಿರುವಾಗ ಆ ಮನೆಯಲ್ಲಿದ್ದ ಯುವಕ ಚಾಕುವಿನಿಂದ ಇವಳ ರಟ್ಟೆಗೆ ಗೀರಿ ಗಾಯಗೊಳಿಸುತ್ತಾನೆ. ಅಳುವಷ್ಟೂ ಸಮಯವಿಲ್ಲ, ಆಗಲೇ ಮನೆಯೊಡತಿ ಇನ್ನೊಂದು ಕೆಲಸ ಮಾಡುವಂತೆ ಬೈಯ್ಯುತ್ತಾಳೆ. ಅಶ್ವತಿಯ ಕಣ್ಣೀರಿಗೆ ಫಾತಿಮಾ ಸಾಂತ್ವನ ಹೇಳಿ ಗಾಯಕ್ಕೆ ಮುಲಾಮು ಹಚ್ಚುತ್ತಾಳೆ. ಇದಾದ ನಂತರ ಮುಂದೊಂದು ದಿನ ಆ ಮನೆಯ ಹಿರಿಯ ದೊರೆ ಆತನಿಗೆ ದೃಷ್ಟಿ ದೋಷವಿದೆ ಎಂದು ಹೇಳಿಕೊಂಡರೂ ಅಶ್ವತಿಯ ಸೊಂಟಕ್ಕೆ ಊರುಗೋಲಿನಿಂದ ತಿವಿಯುತ್ತಾನೆ. ಮಾನಸಿಕ, ದೈಹಿಕ ಪೀಡನೆಗಳನ್ನು ಸಹಿಸಿಕೊಂಡರೂ ಅಶ್ವತಿ ಎಂದೂ ತನ್ನ ಮನೆಯವರಿಗೆ ತನ್ನ ಕಷ್ಟವನ್ನು ಹೇಳಿಕೊಂಡಿಲ್ಲ. ತಿಂಗಳ ಸಂಬಳ ಇಂತಿಷ್ಟು ಎಂದು ಈ ಮೊದಲು ನಿಗದಿಯಾಗಿದ್ದರೂ, ಕೈಗೆ ಸಿಗುವಾಗುವಾಗ ಅದರಲ್ಲೂ ಮೋಸ ಮಾಡಲಾಗುತ್ತಿತ್ತು.. ಹೀಗೆ ತನ್ನ ಕಷ್ಟವನ್ನು ನೆನೆದು ನಿದ್ದೆ ಹೋಗಿದ್ದ ಒಂದು ರಾತ್ರಿ ಏನೋ ಸದ್ದು ಕೇಳಿ ಎಚ್ಚರವಾಗಿ ನೋಡಿದ ದೃಶ್ಯ ಮೈ ಜುಮ್ಮ್  ಅನ್ನುವಂತಿತ್ತು.
ಫಾತಿಮಾ, ಉಸ್ಮಾನ್ ನ ಕೋಣೆಯಿಂದ ಹೊರ ಬರುತ್ತಿರುವುದನ್ನು ನೋಡಿದ ಅಶ್ವತಿ, ಈ ಬಗ್ಗೆ ಉಸ್ಮಾನ್ ನಲ್ಲಿ ಕೇಳಿದಾಗ ಆತ ಇದೊಂದು ಅಡ್ಜೆಸ್ಟ್ ಮೆಂಟ್ ಮಾತ್ರ. ಹಾಗಂತ ನಾನವಳನ್ನು ಮದುವೆಯಾಗುವುದಿಲ್ಲ ಎಂದು ಹೇಳುತ್ತಾನೆ. ಊರಲ್ಲಿರುವ ಹೆಂಡತಿ ಮಕ್ಕಳನ್ನು ಮರೆತು ಈ ರೀತಿ ಸಂಬಂಧ ಇಟ್ಟುಕೊಂಡಿರುವ ಉಸ್ಮಾನ್ ಬಗ್ಗೆ ಅಶ್ವತಿಗೆ ಸಿಟ್ಟು ಬರುತ್ತದೆ. ಮುಂದೊಂದು ದಿನ ಉಸ್ಮಾನ್ ಮತ್ತು ಫಾತಿಮಾ ನಡುವಿನ ಅನೈತಿಕ ಸಂಬಂಧ ದೊರೆಗೆ ಗೊತ್ತಾಗಿ, ಉಸ್ಮಾನ್ ನನ್ನು ಕೆಲಸದಿಂದ ವಜಾಗೊಳಿಸಲಾಗುತ್ತದೆ.

 
ಇತ್ತ ತಪ್ಪಿಗಾಗಿ ಫಾತಿಮಾಳಿಗೆ ಚಾಟಿಯೇಟು ನೀಡಲಾಗುತ್ತದೆ. ಹೊಡೆತ ತಿಂದು ಕಂಗಾಲಾಗಿದ್ದ  ಫಾತಿಮಾಳನ್ನು ಹೇಗಾದರೂ ಮಾಡಿ ಅಲ್ಲಿಂದ ತಪ್ಪಿಸಿಕೊಳ್ಳಲು ಸಹಾಯ ಮಾಡಬೇಕೆಂದು ಉಸ್ಮಾನ್ ಅಶ್ವತಿಗೆ ಹೇಳುತ್ತಾನೆ. ಅಶ್ವತಿ ಫಾತಿಮಾಳನ್ನು ಮನೆಯಿಂದ ತಪ್ಪಿಸಿಕೊಳ್ಳಲು ಸಹಾಯ ಮಾಡುತ್ತಾಳೆ. ಫಾತಿಮಾಳಿಗೆ ಸಹಾಯ ಮಾಡಿದುದಕ್ಕಾಗಿ ಅಶ್ವತಿಗೂ ಚಾಟಿಯೇಟು ನೀಡಲಾಗುತ್ತದೆ. ಹೇಗಾದರೂ ಮಾಡಿ ತಾನೂ ತಪ್ಪಿಸಿಕೊಳ್ಳಬೇಕೆಂದು ಅಶ್ವತಿ ಉಸ್ಮಾನ್ ನ ಸಹಾಯ ಬೇಡುತ್ತಾಳೆ. ಆ ಮನೆಯಿಂದ ತಪ್ಪಿಸಿ ಸಂಜೆ 8 ಗಂಟೆಯ ವೇಳೆಗೆ ಅಲ್ಲೇ ಪಕ್ಕದಲ್ಲಿರುವ ಮಲಯಾಳಿಯೊಬ್ಬರ ಅಂಗಡಿಗೆ ಬಂದರೆ ಆತ ನಿನ್ನನ್ನು ರಿಯಾದ್ ಗೆ ಕಳುಹಿಸುತ್ತಾನೆ. ಅಲ್ಲಿ ನಾನಿರುತ್ತೇನೆ ಎಂದು ಉಸ್ಮಾನ್  ಹೇಳುತ್ತಾನೆ. ಅಂತೂ ಅಶ್ವತಿ ಗೋಡೆ ಹಾರಿ ಮನೆಯಿಂದ ತಪ್ಪಿಸಿಕೊಂಡು ಬಂದರೂ 10 ಗಂಟೆಯವರೆಗೂ ಉಸ್ಮಾನ್ ಹೇಳಿದ ಅಂಗಡಿ ಪಕ್ಕ ತಲುಪಲು ವಿಫಲಳಾಗುತ್ತಾಳೆ. ಕೈಯಲ್ಲಿರುವುದು ಇಂಡಿಯನ್ ಕರೆನ್ಸಿ, ಫೋನ್  ಬೂತ್ ನಿಂದ ಫೋನ್ ಮಾಡಲೂ ಆಗದೇ ಇಡೀ ರಾತ್ರಿ ಆಕೆ ಅಂಗಡಿಯ ಗೋಡೆಯ ಸಂಧಿಯಲ್ಲಿ ಬಚ್ಚಿ ಕುಳಿತುಕೊಳ್ಳುತ್ತಾಳೆ. ಇತ್ತ ಅಶ್ವತಿಯೆಂಬ ಮಲಯಾಳಿ ಗಲ್ಫ್ ದೊರೆಯ ಮನೆಯಿಂದ ಹಣ ಮತ್ತು ಒಡವೆ ಕದ್ದು ಪರಾರಿಯಾಗಿರುವುದಾಗಿ ಸುದ್ದಿ ಮಾಧ್ಯಮಗಳಲ್ಲಿ ವರದಿಯಾಗುತ್ತದೆ.

 
ರಜಾಕ್ ಕೊಟ್ಟೆಕ್ಕಾಡ್, ಎಂಬ ಮಲಯಾಳಿ ಅಲ್ಲಿನ ಸಾಮಾಜಿಕ ಕಾರ್ಯಕತ೯. ಸ್ವಂತ ಕೆಲಸಕ್ಕಿಂತ ಹೆಚ್ಚು  ಗಲ್ಫ್ ರಾಜ್ಯದಲ್ಲಿರುವ ಭಾರತೀಯರಿಗೆ ಸಹಾಯ ಮಾಡುವುದೇ ಇವನ ಕಾಯಕವಾಗಿತ್ತು. ಆಸ್ಪತ್ರೆಗಳ ಮೋಜ೯ರಿಯಲ್ಲಿ ‘ಅನ್ ಐಡೆಂಟಿಫೈಡ್ ಇಂಡಿಯನ್’  ಎಂದು ಲೇಬಲ್ ಹಾಕಿರುವ ಅನಾಥ ಶವಗಳ ವಾರೀಸುದಾರರನ್ನು ಪತ್ತೆ ಹಚ್ಚುವುದು,ಶೋಷಣೆಗೊಳಗಾದ ಭಾರತೀಯರಿಗೆ ನ್ಯಾಯವೊದಗಿಸುವುದು ಹೀಗೆ ಸಮಾಜ ಸೇವೆ ಮಾಡುತ್ತಾ ಎಲ್ಲರಿಗೂ ಆಪ್ತನಾಗಿದ್ದ ರಜಾಕ್. ಹೀಗಿರುವಾಗ ಅಶ್ವತಿಯ ಬಗ್ಗೆ ಮಾಹಿತಿ ಕಲೆ ಹಾಕುವಂತೆ ಪತ್ರಿಕಾ ಸಂಪಾದಕನಾದ ಗೆಳೆಯನೊಬ್ಬ ರಜಾಕ್ ಗೆ ಹೇಳುತ್ತಾನೆ. ಅಶ್ವತಿಯನ್ನು ಹೇಗಾದರೂ ಮಾಡಿ ಪತ್ತೆ ಹಚ್ಚಬೇಕು ಎಂದು ನಿಧ೯ರಿಸಿದ ರಜಾಕ್ ಅಶ್ವತಿಯ ಮನೆಗೆ ಫೋನಾಯಿಸುತ್ತಾನೆ. ಅಲ್ಲಿ ಆಕೆಯ ಅಮ್ಮ ಅಶ್ವತಿ ಕಳೆದ 5 ತಿಂಗಳಿನಿಂದ ಫೋನ್ ಮಾಡಿಲ್ಲ, ಹಣವನ್ನೂ ಕಳುಹಿಸಿಲ್ಲ, ಆಕೆ ಬದುಕಿದ್ದಳೋ ಎಂಬುದು ಗೊತ್ತಿಲ್ಲ ಎಂದು ಕಣ್ಣೀರಿಡುತ್ತಾರೆ.

 

ಇತ್ತ ಅಶ್ವತಿ, ಹಸಿವು ಬಾಯಾರಿಕೆಯಿಂದ ಕಂಗಾಲಾಗಿ ಸುಡು ಬಿಸಿಲಿನಲ್ಲಿ ರಸ್ತೆಯತ್ತ ಹೆಜ್ಜೆ ಹಾಕುತ್ತಾಳೆ. ಆ ರಸ್ತೆಯಲ್ಲಿ ಹೋಗುತ್ತಿರುವ ವಾಹನಗಳಿಗೆ ಕೈ ತೋರಿಸಿ “ರಿಯಾದ್…ರಿಯಾದ್ ಹೋಗುತ್ತಾ?” ಎಂದು ಕೇಳುತ್ತಾಳೆ. ಕೊನೆಗೆ ಆಡುಗಳನ್ನು ಹೇರಿಕೊಂಡು ಹೋಗುತ್ತಿದ್ದ ಲಾರಿಯೊಂದು ಅಶ್ವತಿಯನ್ನು ನೋಡಿ ನಿಲ್ಲುತ್ತದೆ. “ರಿಯಾದ್ ಹೋಗುತ್ತಾ?” ಎಂದು ಕೇಳಿದಾಗ “ಹೂಂ” ಹೋಗುತ್ತೆ ಅಂತಾರೆ. ದಾಹ ನೀಗಿಸಲು ನೀರು ನೀಡಿದ ಲಾರಿ ಡ್ರೈವರ್ ಹಾಗೂ ಆತನ ಜತೆಗಿದ್ದ ಇನ್ನಿಬ್ಬರು ಹಿಂದೆ ಹೋಗಿ ಕುಳಿತುಕೊಳ್ಳುವಂತೆ ಹೇಳುತ್ತಾರೆ. ಆಡುಗಳ ನಡುವೆ ಅಶ್ವಿತಿ ಮುದುಡಿ ಕುಳಿತುಕೊಂಡಾಗ ಅಲ್ಲೊಬ್ಬ ಕುರುಚಲು ಗಡ್ಡ, ಮಾಸಿದ ಬಟ್ಟೆ ಧರಿಸಿದ ವ್ಯಕ್ತಿ ಕಣ್ಣಿಗೆ ಬೀಳುತ್ತಾನೆ. ಅಶ್ವತಿ ಆತನನ್ನು ನೋಡಿ ಇನ್ನಷ್ಟು ಹೆದರಿ ಕೊಳ್ಳುತ್ತಾಳೆ. ಲಾರಿ ಮುಖ್ಯ ರಸ್ತೆ ಬಿಟ್ಟು ಇನ್ಯಾವುದೋ ರಸ್ತೆಯ ದಾರಿ ಹಿಡಿದಾಗ ಅಶ್ವತಿ ಗಾಬರಿಗೊಂಡು “ಸ್ಟಾಪ್… ಸ್ಟಾಪ್” ಎಂದು ಕಿರಿಚುತ್ತಾಳೆ. ಯಾವುದೋ ಒಂದು ನಿಜ೯ನ ಪ್ರದೇಶದಲ್ಲಿರುವ ಟೆಂಟ್ ಪಕ್ಕ ಲಾರಿಯನ್ನು ನಿಲ್ಲಿಸಿ ಎಲ್ಲರೂ ಕೆಳಗಿಳಿಯುತ್ತಾರೆ. ಲಾರಿ ಚಾಲಕ ಮತ್ತು ಆತನ ಇಬ್ಬರು ಗೆಳೆಯರು ಸಂಜೆ ಪ್ರಾಥ೯ನೆ ಸಲ್ಲಿಸುತ್ತಿದ್ದರೆ, ಲಾರಿಯಲ್ಲಿದ್ದ ಆ ಕುರುಚಲು ಗಡ್ಡದ ವ್ಯಕ್ತಿ ಬಶೀರ್ ,ಅಶ್ವತಿಯ ಪಕ್ಕ ಬಂದವನೇ ಆಕೆಯ ಕೈ ಹಿಡಿದು ಓಡಲು ತೊಡಗುತ್ತಾನೆ. ಒಂದಷ್ಟು ದೂರ ಓಡಿದ ನಂತರ ಇಲ್ಲಿಂದ ಹೇಗಾದರೂ ತಪ್ಪಿಸಿಕೊಂಡು ಹೋಗು, ಇಲ್ಲವಾದರೆ ಅವರು ನಿನ್ನನ್ನು ಬದುಕಲು ಬಿಡುವುದಿಲ್ಲ ಎಂದು ಹೇಳಿ, ಆಕೆಯನ್ನು  ಬಿಟ್ಟು ವಾಪಸ್ ಬರುತ್ತಾನೆ.
ಪ್ರಾಥ೯ನೆ ಮುಗಿದ ನಂತರ ಆ ಹುಡುಗಿ ಎಲ್ಲಿ? ಎಂದು ಕೇಳಿ ಲಾರಿ ಚಾಲಕ ಮತ್ತು ಆತನ ಗೆಳೆಯರು ಬಶೀರ್ ಗೆ ಹಿಗ್ಗಾಮುಗ್ಗ ಥಳಿಸಿ ಹೋಗುತ್ತಾರೆ. ಅಷ್ಟೊತ್ತಿಗೆ ಟ್ರಕ್ ಚಾಲಕನಾದ ಬಶೀರ್ ನ ಗೆಳೆಯ ಭರತನ್ ಬರುತ್ತಾನೆ. ನಡೆದದ್ದನ್ನಲ್ಲಾ ವಿವರಿಸಿದ ಬಶೀರ್ ಹೇಗಾದರೂ ಮಾಡಿ ಅಶ್ವತಿಯನ್ನು ಹುಡುಕಬೇಕು ಎಂದು ಗೆಳೆಯನಿಗೆ ಹೇಳುತ್ತಾನೆ. ಮರುಭೂಮಿಯಲ್ಲಿ ಆಕೆಗಾಗಿ ಹುಡುಕಾಟ ಆರಂಭವಾಗುತ್ತದೆ. ಕೊನೆಗೆ ಸುಸ್ತಾಗಿ ಬಿದ್ದಿರುವ ಅಶ್ವತಿ ಅವರಿಗೆ ಸಿಗುತ್ತಾಳೆ. ಈಕೆಯನ್ನು ರಿಯಾದ್ ಗೆ ತಲುಪಿಸು ಎಂದು ಭರತನ್ ಗೆ ಹೇಳಿ ಬಶೀರ್  ವಾಪಾಸಾಗುತ್ತಾನೆ. ಹೇಗೋ ಅಶ್ವತಿಯನ್ನು ಕರೆದುಕೊಂಡು ರಿಯಾದ್ ಗೆ ಬಂದ ಭರತನ್ ,ಉಸ್ಮಾನ್ ನ ವಿಳಾಸ ಪತ್ತೆ ಹಚ್ಚುತ್ತಾನೆ. ಅಶ್ವತಿಯ ಜವಾಬ್ದಾರಿಯನ್ನು ಹೊರಲು ಒಪ್ಪದ ಉಸ್ಮಾನ್ ತನಗೂ ಆಕೆಗೂ ಪರಿಚಯವೇ ಇಲ್ಲ ಎಂದು ಹೇಳುತ್ತಾನೆ. ಇನ್ನು ಬೇರೆ ದಾರಿಯೇ ಇಲ್ಲದೆ ಭರತನ್ ಅಶ್ವತಿಯನ್ನು ತನ್ನ ಕೋಣೆಗೆ ಕರೆದುಕೊಂಡು ಬರುತ್ತಾನೆ. ಆಕೆಗೆ ವಸ್ತ್ರ ಹಾಗೂ ಅನ್ನ ಕೊಟ್ಟು ತಾನು ಟ್ರಕ್ ನಲ್ಲೇ ನಿದ್ದೆ ಹೋಗುತ್ತಾನೆ. ಬ್ಯಾಚುಲರ್ ರೂಮಿನಲ್ಲಿ ಓವ೯ ಹೆಣ್ಣು ಮಗಳಿಗೆ ಆಶ್ರಯ ಕೊಡುವುದೂ ಅಪರಾಧವೇ. ಅದೂ ಅಲ್ಲದೆ ಅಶ್ವತಿಯ ವಿರುದ್ಧ ಕೇಸು ದಾಖಲಿಸಿದ್ದರಿಂದ ಪೊಲೀಸರು ಆಕೆಗಾಗಿ ಹುಡುಕುತ್ತಿದ್ದರು. ಎರಡು ದಿನಗಳ ನಂತರ ಪೊಲೀಸರು  ಭರತನ್ ಮತ್ತು ಅಶ್ವತಿಯನ್ನು ಬಂಧಿಸುತ್ತಾರೆ.

 

ಅಲ್ಲಿನ ಜೈಲಿನಲ್ಲಿ ಅಶ್ವತಿಗೆ ಚಾಟಿಯೇಟು ನೀಡಲಾಗುತ್ತದೆ. ಅಶ್ವತಿ ಬಂಧಿತಳಾದ ಸುದ್ದಿ ತಿಳಿದ ರಜಾಕ್  ಆಕೆಯನ್ನು ಮತ್ತು ಭರತನ್ ನ್ನು ಬಿಡುಗಡೆ ಮಾಡಿ ಹೊರ ತರುತ್ತಾನೆ. ಎಲ್ಲರಿಗೂ ವಿಸಾ ಏಪಾ೯ಟು ಮಾಡಿ ಭಾರತಕ್ಕೆ ಕಳುಹಿಸುವಲ್ಲಿಗೆ ಚಿತ್ರ ಮುಗಿಯುತ್ತದೆ. ಈ ಚಿತ್ರದ ಮೂಲಕ ಕಮಲ್, ಗಲ್ಫ್ ರಾಷ್ಟ್ರಗಳಲ್ಲಿ ಕೆಲಸದಾಳುಗಳಾಗಿ ದುಡಿಯುತ್ತಿರುವ ಮಹಿಳೆಯರ ಕಷ್ಟಗಳನ್ನು ಜನರ ಮುಂದಿಟ್ಟಿದ್ದಾರೆ. ಏನಾದರೂ ಆಗಲಿ ಗಲ್ಫ್ ನಲ್ಲಿ ಹೋಗಿ ದುಡಿದರೆ ಸಾಕಷ್ಟು ಹಣ ಸಿಗುತ್ತದೆ ಎಂದು ಹಂಬಲಿಸಿ ಊರು ಬಿಟ್ಟು ಅರೇಬಿಯಾದ ಮರುಭೂಮಿ ಸೇರುವ ವ್ಯಕ್ತಿಗಳ ಬದುಕು ಈ ರೀತಿ ಇರುತ್ತದೆ ಎಂದು  ತೋರಿಸುವಲ್ಲಿ ಕಮಲ್ ಯಶಸ್ವಿಯಾಗಿದ್ದಾರೆ ಎಂದೇ ಹೇಳಬಹುದು. ಅದೇ ವೇಳೆ ಸಿನಿಮಾರಂಗದಿಂದ ಒಂದಷ್ಟು ಕಾಲ ದೂರ ಸರಿದು ಮತ್ತೆ ವಾಪಾಸಾಗಿದ್ದ ಕಾವ್ಯಾ ಮಾಧವನ್ (ಅಶ್ವತಿ) ಹಾಗೂ ಶ್ರೀನಿವಾಸನ್ (ರಜಾಕ್) ತಮ್ಮ ನೈಜ ಅಭಿನಯದಿಂದ ಸೈ ಎನಿಸಿಕೊಂಡಿದ್ದಾರೆ.

Older Entries