Image

ಗುರುಗಳೆಂದರು

ನಿನ್ನ ದಯೆ ತುಂಬಿದ ಕಣ್ಣುಗಳು

ಈ ನಾಜೂಕು ಬೆರಳುಗಳನ್ನು

ನನಗೆ ಕೊಡು

ನಾನಿದರಲ್ಲಿ ಕವಿತೆಯ ಅಗ್ನಿ

ಜ್ವಲಿಸುವಂತೆ ಮಾಡುವೆ

ನಾನು ಅವೆರಡನ್ನೂ ಕೊಟ್ಟೆ

ಅವರು ಅದರಲ್ಲಿ ತಳಮಳ

ವನ್ನೂ ಜೀವನದ

ನೋವನ್ನೂ ತುಂಬಿದರು

ವಿಪ್ಲವಕಾರಿಯೊಬ್ಬ ಹೇಳಿದ

ನಿನ್ನ ತುಂಬಿದ ಯೌವನ

ಬುದ್ಧಿಮತ್ತೆ, ಬಲವಾದ ಮೈಕಟ್ಟು

ನನಗೆ ಕೊಡು

ನಾನು ನಿನಗೆ ಸ್ವೇಚ್ಛೆಯನ್ನೂ

ಸ್ವಾತಂತ್ರ್ಯವನ್ನೂ ನೀಡುವೆ

ನಾನು ಅದೆಲ್ಲವನ್ನೂ ಕೊಟ್ಟೆ

ಅವರು ಅಧಿಕಾರದ ಲೋಕಲ್

ಕಮಿಟಿಯಲ್ಲಿ ಕಿತಾಪತಿ ಮಾಡಿ

ಕೊನೆಗೆ ಸಚಿವರಾದರು

ಪ್ರಿಯಕರ ಕೇಳಿದ

ಸ್ಫಟಿಕದಂತಿರುವ ನಿನ್ನ ಹೃದಯ

ಮುಗ್ಧ ಮಾತು,

ದಿಟ್ಟತನದ ನಿನ್ನ ಹೆಜ್ಜೆಗಳನ್ನು

ನನಗೆ ಕೊಟ್ಟು ಬಿಡು

ನಾನು ನಿನಗೆ ಪ್ರಣಯದ

ಸುಗಂಧವನ್ನೂ, ಸ್ನೇಹದ

ರಕ್ಷಣೆಯನ್ನೂ ನೀಡುವೆ

ನಾನವನಿಗೆ ಎಲ್ಲವನ್ನೂ ಕೊಟ್ಟೆ

ಆದರವನು ಎಲ್ಲ ಹುಡುಗಿಯ

ರೊಂದಿಗೆ ಚಕ್ಕಂದವಾಡುತ್ತಾ

ನನ್ನ ಹೃದಯವನ್ನು ಇನ್ನೊಬ್ಬಳೊಂದಿಗೆ

ಹೋಲಿಸಿ ನೋಡಿ

ಸಿಂಗಲ್ ಎಂದು ಸ್ಟೇಟಸ್ ಹಾಕಿ

ಮತ್ತೊಬ್ಬಳಿಗಾಗಿ ಅರಸುತ್ತಾ ನಡೆದ…